An eil gwech e oa da zerc’hel ar forom-mañ e leurenn Glenmor e Karaez. Tremen daou-ugent a dud a vicher a oa deuet da zivizout gant hon tredeidi ha gant al liseidi o doa c’hoant, un daou-c’hant bennak a dud yaouank en holl. E-pad div eurvezh hanter bennak ez eus bet birvilh en-dro d’ar standoù. Dre strolladoù bihan e veze degemeret skolajidi ha liseidi hag aketus e oant o klask gouzout doareoù ar micherioù, ar studioù ha kement ‘zo. E brezhoneg ez ae ar gaoz en-dro, gant siriusted ha plijadur war un dro. Micherioù liesseurt : media, arz, labour-douar, natur, gwir, mezegiezh, skiantoù, desaverezh, kelenn, sevel-tiez, embann, urzhiataerezh, kontaouerezh… pe c’hoazh emgav gant ur c’huzulier heñcherezh-skol !

Komz diwar-benn ur vicher er c’hlas pe er gêr a zo un dra, met mont d’he dizoloiñ en ur staj pe c’hoazh amañ, en ur gomz gant an dud, a zo disheñvel a-grenn. An dud a vicher a zo bet souezhet meur a hini anezho gant goulennoù dik ha rik ar re yaouank.

Ur bazenn ouzhpenn eta war hent ar c’hlask dazont evit hor re yaouank. Darn o deus ur soñj resis hag a c’hell muzuliañ ar c’heit a chom d’ober ganto a-barzh tizhout ar pal, darn a vez entanet gant micher-mañ-micher, darn n’o deus ket kavet o c’hoant eno, darn c’hoazh a wel war beseurt tu ne fell ket dezho skeiñ. A bep seurt a zo…

Merzomp e oa deuet en-dro an darn vrasañ eus tud a vicher warlene, pezh a zo sin vat, trugarez dezho, gant unanig bennak ouzhpenn, hag e chom hent d’ober da zigeriñ da strolladoù micher n’int ket bet gwelet c’hoazh. Goude Skolaj Diwan Jakez Riou e vo tro Skolaj Diwan ar Mor-Bihan da aozañ ar C’hroashent er bloaz a zeu. Salv ma teuio an emgav bloaziek-mañ da vezañ egin ur rouedad daremprederezh e brezhoneg etre tud a vicher ha danvez tud a vicher !