GOURLEN ER GELVENEG da eñvor Dominig JOLIVED

Ne oa ket c'hoazh mare reverzhi gedez

P'edomp e dibenn miz genver,

Petra an diaoul,eta a c'hoarvez,

Heoliet ha gouyen e oa an amzer.

Ur c'harter eus ar Gelveneg aloubet,

Ur morad tud a oa er biojoù,

Tud yaouank, tud kozh a oa nouspet,

Ne oa nag oferenn, na gousperoù.

Skolidi ha skoliajidi a oa stank ivez,

Sadorn endervezh a oa anezhi,

Diouzh o entan, diouzh o fouez-mouezh,

E brezhoneg 'oant deuet da zougen bri.

Da zougen bri e oant deredet holl,

Eus Breizh Izel, eus Breizh Uhel,

Er Gelveneg na kabaduilh, na diroll,

Nemet kimiad d'un emsaver hael.

Gwad a oa gantañ dindan e ivinoù,

En e galon, en e spered e oa tan,

Den hollvedel, den a stourmoù,

Red-micher penn da benn e DIWAN.

Eus Euskadi, Kembre, Iwerzhon 'teuas dasson

Diouzh ur « pipe-ilin » 'savas leñvadennoù,

Ar saliad tud a oa mudet ha sonn,

Mouget an holl gant o fromadennoù.

Ar serch 'oa staliet war al leurenn,

Goloet gant ar banniel Gwenn ha Du,

E penn anezhañ, ur rozenn wenn

Glac'har ha kañv ivez a-bep-tu.

War al leurenn 'teuas tro-ha-tro

Tud-nes, mignoned ha kamaladed

Evit enoriñ an den kar-e-vro,

Tregeriz, Kerneviz ha Bigoudenned.

An den karet, aet diganomp, emezo,

A oa un den emroüs ha leun a spi

Kanet e voe evitañ « Karantez Vro »,

Gant laz-kanañ fromet e skolajidi.

Emgann, Stourm ar Brezhoneg, DIWAN,

Gant an holl bobloù bihan e oa kengret,

Etre Beg an Dorchenn ha Beg ar Van

'Mañ aod ha gwrizioù Dom' JOLIVED

Ronan an Henaff