Ewen, da vat gant e albomoù eured...

Plakenn ar stal e zegemere

Héloïse en he bleud o renkañ dilhad

Amañ dindan peder dezrevell pleustradoù micher. Trugarez d'an dezrevellourien. Skeudennoù a vo klasket lakaat da heul...

STAJ MICHER E ABATI DAOULAZ

Etre an 30 hag an 31 a viz Mae on bet oc'h ober ur staj micher e Abati Daoulaz. An den a oa e karg ac'hanon a oa anvet Régine, sekretourez eo. Kalzik micherioù am eus gwelet, teir micher o deus plijet din kalzik : infografour, buhezour ha liorzhour.

Infografour

Bet on gant un infografourez anvet Elodie. E karg emañ eus bruderezh "Hent ar glad". "Hent ar glad" a zo ur strollder lec'hioù a bouez e Penn-ar-Bed. En o zouez emañ Abati Daoulaz, Kastell Keryann, Kastell Trevarez ha Maner Kernod. Neuze, ganti em eus savet ur bruderezh evit lakaat war ul lec'hienn internet. Plijet on bet gant ar vicher-se peogwir e plij din ar stlenn.

Liorzhour

Bet on gant liorzhourezed anvet Morgane ha Virginie. E karg emaint eus liorzh ar plant-louzoù hag eus ar park. Bouetaet em eus deñved eus Enez-Eusa, lakaet em eus e plas tikedennoù ma oa skrivet warno anvioù ar plant e brezhoneg, dilouzaouet em eus er park ha desket em eus ober glec'hiadurioù gant plant-louzoù. Plijet on bet peogwir e plij din ar plant ha desket em eus kalz traoù diwar o fenn.

Buhezour

Bet on gant buhezourezed anvet Yolenn hag Elodie (un eil). Divyezhek e oa Elodie. Savet em eus ganto un abadenn diwar-benn c'hwezh ar plant. Anvet e oa an abadenn "ar boestoù c'hwesha". Ur weladenn am eus graet eus liorzh ar plant-louzoù gant ur skolaj hag ur weladenn eus an diskouezadeg diwar-benn Victor Segalen ha Polinezia, ma-unan e oan. Plijet on bet peogwir em eus desket kalz traoù.

Kalz traoù am eus desket e-pad ar staj-mañ. Plijet on bet gant ar skipailh. Met bremañ ez eo gwashoc'h evit dibab ur vicher !

Enora, 4re Glas

E TI UL LEGUMAJER BIO

Etre al Lun 30 hag ar Merc'her 1añ a viz Mezheven am eus graet ur staj micher e feurm Jean-Paul Madec a zo staliet e Gwiskri.

Ul legumajer bio, da lavaret eo ne implij na produioù kimiek na temzoù kimiek. Mont a ra da werzhañ anezho war bemp marc'had bep sizhun.

Pemp hektar douar en deus en e feurm ha prestiñ a ra ur prad d'e amezeg a zo desaver saout bio. An amezeg a droc'h ar geot evit ober foenn da reiñ d'e saout, en eskemm da deil e saout, a servijo da binvidikaat an douar.

Eizh ti-gwer a zo en e feurm : unan anezho a servij da lakaat plant da greskiñ evit gwerzhañ anezho, hag ar seizh a chom a servij da lakaat da greskiñ frouezh pe legumaj en tommder, da skouer tomatez pe meloñs. Produiñ a ra tamm pe damm hanter-kant seurt frouezh pe legumaj. Tout ar plant pe ar greun a zo produet war al lec'h.

Labourat a ra gant e wreg.

Pa oan eno am eus desket anvioù frouezh pe lugumaj ha bet on o werzhañ war zaou varc'had : hini Rostrenenn ha hini Banaleg. Plijus-tre e oa !

N'ouzon ket hag-eñ am eus c'hoant d'ober ar vicher-se pa vin bras, peogwir eus un tu e plij din ober war-dro legumaj ha mont da werzhañ anezho war marc'hadoù ; met ma holl amzer a vefe implijet gant  se.

Gounidus a-walc'h eo ar vicher-se, met ret eo kregiñ e-barzh, ha kaout c'hoant d'ober.

Evit ober ar vicher-se eo ret bezañ ur gwerzher mat ha gouzout mat labourat an douar.

Liza, 4re Glas

APOTIKEREZH AN OSPITAL

D'al Lun 30, d'ar Meurzh 31 ha d'ar Merc'her 1añ a viz Even on bet evit ar wech kentañ en ma buhez e apotikerezh ospital Kemper, "Ospital Laënnec". Souezhet on bet gant ment apotikerezh an ospital e-keñver an apotikerezh a zo e kreiz-kêr da skouer. Da'm soñj eo pemp gwech brasoc'h eget un apotikerezh kêr. Souezhet on bet ivez gant an niver a louzoù a zo (war-dro ur milion a louzoù disheñvel a zo). An holl louzoù a zo renket dre urzh lizherennek evit mont buanoc'h da zastum ha da renkañ anezho.

Desket am eus kalz a draoù, bez ez eus div vicher disheñvel d'an nebeutañ e apotikerezh an ospital : bez emañ an aozerien hag an apotikerien. An aozerien a fard louzoù evel gelulennoù hag an apotikerien a renk hag a zastum al louzoù evit ar servijoù disheñvel a zo en ospital. Diaes eo dastum al louzoù mat buan ha goude eo ret lakaat anezho e-barzh kombodoù evit an holl glañvourien (ur c'hombod = ur c'hlañvour) ha ret eo renkañ al louzoù dre amzer (mintin, kreisteiz, abardaez, noz). Desket am eus ivez e vez gwerzhet louzoù d'an dud a zeu en ospital just evit prenañ o louzoù. Al louzoù-se ne vezont kavet ha gwerzhet nemet en ospital peogwir int louzoù ker-tre ha ral-tre (war-dro 400 € ul louzaouenn). Ne bae ket ar glañvourien al louzoù.

Desket am eus ivez e oa ret leuskel ur blakennad louzoù d'an nebeutañ er stok. Da skouer ma vez goulennet gant ur servij pevar fakad strinkerezioù ha ne chom nemet pevar e vo ret leuskel ur pakad d'an nebeutañ evit ar vallusted.

Gwelet am eus ivez an drammoù. Renket int e-barzh un armel vras gant ur c'hod peogwir eo dañjerus. Da skouer, ma 'z eus ur medisin drammet e c'hell kemer e-barzh an armel. Ret eo gouzout e c'hell bezañ dañjerus al louzoù-se ma vez kemeret re. Dont a ra al louzoù da vezañ dramm.

Plijus e oa ar staj met n'am eus ket c'hoant ober ar vicher-se. C'hoant am eus da vezañ medisinez peogwir e vez gwelet traoù ha tud disheñvel bemdez en ur chom gant ar c'hleñvedoù hag al louzoù. Emichañs e vo kavet gant an apotikourien louzoù a-enep ar Sida, an holl grignoù-bev...

Agathe, 4re Melen

STAJ E "Gédéz'ailes"

E-pad tri devezh on bet en un embregerezh infografouriezh anvet "Gédezel".

E-pad an tri devezh-se em eus labouret gant Christian, ur stajiad a oa eno e-pad ur miz pe muioc'h.

Desket 'm eus kalz a draoù en ur labourat war albomoù eured evel implij photoshop ha meziantoù all.

Met al labour infografour n'eo ket nemet albomoù eured, graet em eus ivez ur follenn-bleg evit "ad star" ha traouigoù all.

E-pad an tri devezh-se n'em eus ket desket tout, ar pezh a zo reizh. Hag evit lavaret tout ez eus kalz a skourroù er vicher-se ha n'eo ket an hini am eus c'hoant d'ober met tost eo memestra.

Ewen Berthou, 4re Glas