Setu ul luc'hskeudenn eus dalc'h 2008 ar reizhskrivadeg e Ti ar Vro Kemper. Ur gaer a abadenn a vod rummadoù tud evit plijadur ar yezh skrivet reizh.
undefined  Skeudenn Ti ar Vro Kemper

Da heul, testenn an dro gentañ-mañ.
SPORT

    Ezhomm hon eus holl d’ober sport evit kaout ur spered yac’h en ur c’horf yac’h. Vad a ra d’ar vugale, d’ar re yaouank, d’ar re vras koulz ha d’ar re gozh. E pep amzer hag e pep lec’h ez eus bet ijinet sportoù gant an dud. Diskuizhañ eus al labour korf o lakaat ar c’horf da labourat evit c’hoari ar wech-mañ.

(fin reizhskrivadeg ar CE hag an dud gour deraouidi)

    A bep seurt sportoù a zo, reoù a-hiniennoù ha reoù a-stroll. Sportourien brudet-bras er c’helaouennoù, er radio, er skinwel, war internet, pe sportourien divrud evit plijadur ar sport nemetken. Sportoù liesseurt a ginniger bremañ e kluboù pe kevredigezhioù niverus. Peadra da bep hini da gavout an hini a zegouezho ar gwellañ gantañ pe ganti.

(fin reizhskrivadeg ar CM hag an dud gour a live etre)

    E-touez ar sportoù a-stroll emañ ar vell-droad, an hand-ball pe c’hoazh ar volley-ball a sach ur bern skipailhoù hag o suporterien war an tachennoù-c’hoari bep dibenn-sizhun. Ar rugbi ivez a zo oc’h ober e dreuz tamm-ha-tamm e Breizh. Arabat disoñjal e veze c’hoariet mellad gwechall war hor maezioù hag e veze lakaet bec’h ruz etre paotred ar parrezioù enebet da zerc’hel ganto c’hwezigell hoc’h an trec’h.  Reolennet spis eo an holl sportoù met dreist pep tra e tle an holl c’hoari reizh, kuit a drucherezh.

(fin reizhskrivadeg ar skolaj hag an dud gour varrek)

    “M’en tou da c’houren gant lealded, hep trubarderezh na taol fall ebet,” eme ar c’hourenerien dre o le. Rampet start war pallennoù-leur ar salioù-sport pe sanket o zreid er brenn-heskenn e kevezont hael da c’hounit maout ar c’hourenadeg, kib pe vedalenn, pe c’hoazh maout yaouank  arouez a drec’h.
    Sportoù a-stroll, sportoù emgann, douar atleterezh eo Breizh ivez. War an hent-red pe a-dreuz maezioù e stourm an atleted outo o-unan pe a-heligentañ ouzh o c’hevezerien.

(fin reizhskrivadeg al liseidi hag an dud gour ampart)


    Ne vo ket ankounac’haet marc’hhouarnerien brudet pe zivrud an hentoù bras pe ar c’harrhentoù, na tud ar sportoù dour dous pe dour sall.
Bezet a vezo, plijet e vo Yann  sportour pe Katell sportourez o kemer perzh er Redadeg evit ar yezh a vo dalc’het evit ar wech kentañ da gala-Mae hevlene, ur biltrotadeg a-eilek ma vo roet a zorn da zorn ar vazh-test, arouez ar yezh a fell deomp komz ha legadiñ d’ar rummadoù da zont.

(fin reizhskrivadeg an dud gour a live uhel)

DSCF0323-2-.jpg
Skeudenn lod eus al loreidi gant Ti ar Vro Kemper

Degemer