Kroget eo bet mizvezh "War-zu Su Amerika" gant ar skolaj. Gallout a reer gwelout un diskouezadeg gouestlet d'an Indianed Kechua a zo o vevañ en Ecuador el levraoueg hag er raksal-debriñ.
Eric Robin a zo deuet da zisplegañ d'ar re 6vet penaos en doa graet evit lakaat 6 Indian Kechua (2 blac'h 20 hag 50 vloaz, ha 4 faotr) da zeskiñ penaos e vez kemeret fotoioù. Laosket ez eus bet dezho binvioù-foto ha kemeret o deus 4 film fotoioù gwenn ha du diwar-benn buhez al labourerien douar du-hont. E-lec'h kaout fotoioù liesliv Bro-Berou gant roz, ruz, livioù flamm-flimin, setu fotoioù n'int ket kemeret gant touristed, met gant tud ar vro, ha gwelet e vez o doare da vevañ, ar vugale, al loened ...
Eric Robin
Aketus ha dedennet oa ar re 6vet. Souezhet int bet o welout e oa ar baotred yaouank gant kasketennoù rap, hag ar merc'hed alies gant togoù feltr, ha dilhad hengounel. Er skol e komzont kechua (ar yezh indian ar muiañ komzet en Amerika) ha kastilhaneg. Ne c'hellont ket mont d'ar skol e-pad pell : ar skolajoù publik a vez serret alies (ne vez ket paeet ar gelennerien gant ar Stad hag e reont harz-labour), neuze eo ret bout pinvidik evit gallout heuliañ studioù e skolajoù ha liseoù prevez.
Siriusted hag aked

En uhelder a 3 000 metrad e teuont a-benn da c'hounit legumaj a bep seurt : avaloù douar, tomatez, maiz ruz, melen ha du, ... Hag a-wechoù e vez gwerzhet legumaj evit prenañ toazennoù e kêr, ar pezh a zo kalz falloc'h evit o yec'hed ! A-benn ar fin eo heñvel buhez an Indianed Kechua ouzh hini labourerien-douar Breizh er bloavezhioù 1950, traktor ebet, nebeut a dra prenet en diavaez, met tud n'int ket trist memestra. Gant ur vaouez eo bet lavaret da Eric Robin : "tud a lavar on paour, met ne ouien ket e oan paour a-raok ma vije lavaret din !!!!".
Danvez kazetennerezed...
Catégories : Buhez ar skolaj
Degemer