E Chester e oamp bet holl : 41 skolajiad 5vet klas Skolaj Diwan Jakez Riou e-pad an trimiziad kentañ. Met a-raok mont kuit e oa bet dalc'het ar c'harr-boutin : torret e oa ar voest evit cheñch tizh ! Ha divizet hor boa mont kuit memes tra gant ar c'harr-boutin... torret. Pebezh fazi !

Erruet e oamp e Chester daoust d'ar c'harr-boutin bezañ torret. En ur parking e oamp chomet a-sav ha deuet e oa ar familhoù saoz da zegemer ac'hanomp, ha ni d'ober anaoudegezh ganto. Diaes e oa kompren saozneg ar familhoù digemer met jentil e oant ! Souezhet e oamp bet gant mod an tiez, kalz tapisoù a c'holoe diabarzh an tiez : al leur, ar mogerioù, ar solier, ar skalieroù ha zoken er jardin. Bihan e oa al liorzhoù, e plastik e oa ar geot a-blasoù, ha gwelet e veze kizhier-koad alies. E karterioù 'zo e oa stank-tre an tiez, gwisket holl a vrikoù ruz.

Brikoù-ruz ha tiez-prenn mañsonet

O pourmen war voger-greñv Chester e oamp bet goude-se, oc'h ober tro kêr. Diouzh ar voger hor boa gwelet ar c'hreiz-kêr : berniet e oa ar stalioù e-barzh savadurioù mod kozh, tiez prenn gwenn gant treustoù du, enno e oamp bet o c'hoari shopping. Taolet hor boa ur sell ouzh ar stêr Dee, alese e teu anv kozh ar gêr : "Dewa" a rae ar Romaned anezhi. Ur pezh mell iliz a oa e kêr, kalz salioù enni, hag e kreiz e oa souchet ul liorzhig gant ur feunteun, e peoc'h.

Kentelius e oa bet ar veaj : mirdi Chester, ar Romaned, uzin ar chokolad, ha ti ar gouleier-koar. Plijadur hor boa bet forzh pegement er c'harr-boutin, daoust dezhañ bezañ chomet bourdet e Bro Saoz. Kirri all a oa bet prestet deomp neuze, hag un tamm brav a hini zoken, evit an distro, ennañ hor boa kousket klet, astennet war an azezennoù dibleget.